A realidade aumentada permite ampliar a información e contidos dunha peza física, a través da intermediación dun dispositivo dixital (xeralmente móbil). Propoñemos traballar sobre as posibilidades de aplicar AR con creador*s da cidade, especialmente das artes visuais, como a ilustración ou a arte urbana, entre outras moitas aplicacións.

Para achegarnos ás posibilidades desta tecnoloxía exploraremos o uso de Vuforia, un software que se pode usar como extensión de Unity, unha das principais plataformas para crear videoxogos e animacións en 3D.  Esta ferramenta permite recoñecer unha imaxe a través da pantalla do móbil ou da tableta e crear unha capa de información que a modifique ou engada contido a partir desta imaxe.

Nesta primeira sesión de aprendizaxe colaborativa, coordinada por Aida Vidal, veremos un exemplo completo dun proxecto en AR, coñeceremos a ferramenta sobre a que traballaremos e formaremos equipos para comezar a facer os primeiros proxectos.