Popathon é unha serie internacional de hack jams e talleres que reúne a creador*s audiovisuais, programador*s e deseñador*s para prototipar xuntas o futuro das narrativas nativas en internet (web-native storytelling).

A proposta que xa se levou a cabo en Barcelona, Berlín, París, Londres e Lisboa, chega agora á Coruña. Así, entre a tarde do venres 11 e o sábado 12 de novembro, poderás unirte a un equipo multidisciplinar no que xerar ideas, crear en código aberto e xerar un prototipo creado na web.

Algúns exemplos de prototipos desenvolvidos noutras edicións de Popathon:

• Berlin on Brexit in VR:  https://popathon.github.io/Gexit/hq.html
• Paraules de Barcelona: http://paraules.midori.ber.to/
• Barcelona Says: http://bcnsays.senbei.ber.to/

Durante o evento contaremos con facilitadores e mentores expertos e innovadores na súa área:

Philo van Kemenade iniciou Popathon para potenciar o desenvolvemento dunha linguaxe narrativa interactiva que encaixase na natureza da web.

Philo combina vídeo, datos e a web para facer narrativas con máis conexión co público e polo tanto para ampliar o seu impacto. Os seus coñecementos en Intelixencia Artificial e a súa paixón pola creación audiovisual levouno da súa Holanda natal a Londres, onde investigou data-driven storytelling utilizando vídeos xerados e subidos á rede por usuarios. Cre firmemente que a experimentación multidisciplinar pode impulsar este campo creativo de xeito notable.