Na primeira parte desta sesión -De que falamos cando falamos de narrativas populares contemporáneas?- faremos unha introdución aos temas e linguaxes cos que imos traballar no grupo, dando unha panorámica do contido a tratar: que son e como funcionan as narrativas populares en Internet. Dentro da panorámica abordaremos estes temas:

• A linguaxe popular de Internet: como é, quen a produce, onde se distribúe, para que serve.
• Subculturas dixitais. Que teñen en común os gatos, Operación Triunfo e Bolsonaro?
• Memes, stories, ilustración, fíos de Twitter… cales son as ferramentas e linguaxes ao noso alcance?

Na segunda parte da sesión estableceremos a composición do grupo, os obxectivos para o trimestre e o método de traballo, tanto presencial como online.

Este é o programa previsto para as vindeiras sesións:

• 1 de febreiro: Novos xéneros audiovisuais na Rede
• 15 de febreiro: Taller de videocreación e animación para a Rede, con Christian Flores e Anabel Lorente
• 1 de marzo: As plataformas configuran a linguaxe de Internet
• 15 de marzo: Repaso e finalización dos traballos

Ademais dunha sesión final, común a todos os grupos do LAIC, o 22 de marzo.

O grupo de narrativas populares contemporáneas do LAIC está coordinado por María Yáñez. Podes formalizar a túa inscrición, que como todas as actividades de Coruña Dixital é gratuíta, desde aquí.